Uppljóstrun!

Ég var beðinn um að svara því, í spurningu við færsluna hér að neðan, hvaða flokk ég ætlaði að kjósa í komandi kosningum. Ég hef sagt það áður að ég er óflokksbundinn og að ekkert af flokkunum höfðar 100% til minna skoðana. Aftur á móti hef ég nú gert upp hug minn. Margir myndu kannski segja að ég hafi verið búinn að því fyrir löngu en svo er ekki. Eftir að hafa horft á fjörlegar umræður á Stöð 2 í gær fékk ég staðfestingu á því hverja ég ætla að kjósa.

Að mörgu leiti er valið ekkert sérlega fýsilegt. Frjálslyndir strokuðu sig út með innflytjenda-umræðunni, Samfylkingin með lýðskrumi í fjölda mála, Framsókn með stóriðjuofstæki, ömurlegri kosningabaráttu og ábyrgðarleysi í spillingarmálum og Íslandshreyfingin með ósannfærandi uppstillingu á listum sínum.

Þá eru eftir 2. flokkar. Sjálfstæðisflokkurinn og VG. Að mörgu leiti á ég mest sameiginlegt með stefnu margra innan Sjálfstæðisflokksins. Ég verð meiri og meiri frjálshyggjumaður með hverjum líðandi degi. En Sjálfstæðisflokkurinn er bara ekki mjög sannfærandi sem frjálshyggjuflokkur. Kannski hann hafi litast svona af samstarfi við Framsókn? Kannski togast þarna á ýmiskonar öfl og þar tapar hreinræktuð frjálshyggja oft fyrir íhaldssömum og rykföllnum hugmyndum? Eitt er víst, að frjálshyggjan ræður ekki þegar flokkurinn stendur í stórkostlegum atvinnu-töfralausnum á borð við Álver hér og þar um landið. Ekki hjálpar Sinnuleysið gagnvart því frábæra tækifæri að fá að taka þátt í risa tónleikahaldi sem 2 miljarðar manna yrðu vitni af og íslensk tónlist fengi notið góðs af. Hversvegna skyldu ráðandi öfl ekki hafa stokkuð um borð án þess að hika? Sjálfsagt vegna þess að náttúruverndarboðskapurinn var þeim ekki í hag. Ekki hjálpar til stuðningurinn við Írakstríðið. Ekki hjálpar til nýi skandallinn hans Björns Bjarnasonar. Þetta ásamt því að ég held að það sé einfaldlega nauðsynlegt og holt fyrir land og þjóð að breyta til, er ástæða þess að ég get ekki hugsað mér að kjósa íhaldið.

Í þætti Stöðvar 2. í gær voru leiðtogar flokkana beðnir um að segja hver yrðu fyrstu verk þeirra ef þeir kæmust til valda. Steingrímur J. sagði m.a. að taka Ísland af lista þeirra sem styðja blóðbaðið í Írak, biðjast formlega afsökunar og hefjast handa við aðstoð flóttamanna þaðan. Þessi maður fær atkvæði mitt. Maður sem ásamt fáliðuðum þingflokki hefur staðið umhverfisvaktina einn flokka, áður en það komst í tísku að vera grænn einsog allir flokkar virðast vera orðnir í dag. Ég er ekki alltaf sammála öllu sem hann segir, en þegar ég hef forgangsraðað hlutunum, þá er valið augljóst.

x-v

Veriði sæl!

Athugasemdir

[Auðun Gíslason, 10.5.2007 kl. 11:23]

Hjartanlega til hamingju með valið!  Áfram VinstriGræn!

[Sigrún Jóna Hauksdóttir (IP-tala skráð) 10.5.2007 kl. 12:52]

Þetta er nákvæmlega það sem ég var að meina í commentinu sem ég skrifaði í gær. Það ættu allir að fara í svolitla sjálfskoðun fyrir kosningar og taka ákvörðun út frá því sem skiptir þá máli. Ekki vegna þessa að það er í tísku að kjósa þennan eða hinn, sem mér finnst oft brenna við hjá ungu fólki eins og mér. Svona fáum við út sem lýðræðislegasta kosningu. Til hamingju með valið, ákvörðunin þín er allavega tekin að vel ígrunduðu máli að mér virðist og það er það sem skiptir máli.

Kv, Sigrún

[Davíð Stefánsson (IP-tala skráð) 10.5.2007 kl. 17:49]

Rokk og ról, Gaukur. Góð röksemdafærsla, góð niðurstaða. Einmitt af þessum sökum kýs ég Vinstri-græna - það eru heilindi og staðfesta í gangi.

Kveðja,

Davíð

[Kristín Björg Þorsteinsdóttir, 10.5.2007 kl. 18:24]

x-v hjá mér líka. Ég hef ekki áður kosið vinstri grænar í þingkosningum og finnst á margan hátt leiðinlegt að kjósa ekki samfylkinguna. En það er eitthvað við stefnufestu þeirra grænu sem heillar mig.

[Snorri (IP-tala skráð) 11.5.2007 kl. 01:09]

Það sem gerir mig spenntan fyrir vinstri stjórn er að þá kæmi í ljós að þar er sennilega alls ekkert minni spilling og alls ekkert betra fólk en í hinum flokkunum. Ég undanskil hér samt Framsókn, þar er spillilng á heimsmælikvarða.

Það er eitt sem einkennir alla stjórnmálamenn, alveg sama hvort það er Steingrímur J. Sigfússon, Geir Haarde eða Ingibjörg Sólrún og það er að þau vilja meira en allt RÁÐA. Það er þessi valdagræðgi sem einkennir nær alla ísl. stjórnmálamenn og stafar hún ekki að því að þeir vilji endilega láta gott af sér leiða eða koma sínum stefnumálum af framfæri. Nei, þeir vilja bara ráða og ef þeir ná kosningu þá munu þeir gera bara mátulega nóg á meðan þeir eru við völd svo að þeir verði vonandi kosnir aftur að fjórum árum liðnum.

[Birgitta Jónsdóttir, 11.5.2007 kl. 06:40]

Mikið er ég ósammála þér Snorri. Það getur vel verið að flestir stjórnmálamenn séu þannig en ekki það fólk sem ég hef kynnst, það er reyndar meira og minna allt á vinstri vængnum. Ég hef séð þetta fólk leggja meira á sig en flestir aðrir einmitt út af því að þeim er ekki sama og hafa tekið þetta skref sem flestum íslendingum er ómögulegt: að fatta að maður sem einstaklingur getur komið heilmiklu til leiðar ef maður er tilbúinn að gefa sig allan í það. Þetta fólk sem ég hef fylgst með vinna sér í lagi hjá VG er bæði hreinskiptasta og duglegasta fólk sem ég hef kynnst ásamt þeim sem hafa verið að vinna í grasrótinni, hérlendis og erlendis. Það er eitthvað sérdeilis sérstakt við það að sjá fólk fylgja hugsjón alla leið sem einkennist af virðingu fyrir mannréttindum. Því miður á hið sama ekki við um flesta aðra flokka þar sem þessi lýsing þín á kannski við.

[Sigurður Viktor Úlfarsson, 11.5.2007 kl. 12:25]

Sæll Úlfarsson, 

Virði þig fyrir að taka málefnalega afstöðu, leggjast í sjálfskoðun og leggja á þig vinnu við að velja á milli þeirra kosta sem eru í stöðunni.  Út á það gengur lýðræðið og þetta er til fyrirmyndar.  Er reyndar ósammála niðurstöðunni en það er líka hluti af lýðræðinu að telja mismunandi skoðanir hinn eðlilegasta hlut.

Það sem ég hnaut um er þetta fyrsta verk Steingríms að taka okkur af þessum lista sem hefur aldrei verið til.  Ótrúlega heimskulegt lýðskrum.

Á sínum tíma þegar skipti máli hvort menn væru á listanum eða ekki þá studdu Íslendingar með Davíð og Halldór í broddi fylkingar, þessa innrás þótt það væri gegn vilja meirihluta þjóðarinnar.  Núna fjórum árum seinna, þegar búið er að drepa hundruð þúsunda manna, kvenna og barna samkvæmt þessu umboði, er ekki hægt að vera vitur eftir á og bakka út og segja "Úps!".  Við studdum stríð.  Það dó fullt af fólki og það er ekki hægt að koma fjórum árum seinna og hætta við.  Skaðinn er skeður og það eina sem við getum gert til að bæta fyrir ódæðið er annars vegar að styðja við uppbygginguna í Írak til að reyna að bæta samviskubitið og hins vegar að læra af þessu og gera aldrei þessi mistök aftur.

Ég endurtek, það er ekki hægt að drepa fyrst fullt af fólki og draga síðan umboðið fyrir drápinu til baka eftir á þegar skaðinn er skeður.  Það vekur þetta fólk ekki aftur til lífsins.  Við bárum ábyrgð á þessu stríði fyrst við studdum það á sínum tíma.  Því verðum við að lifa með hvort sem okkur líkar það betur eða verr þökk sé Davíð og Halldóri.  Þetta er lýðskrum hjá Steingrími af verstu sort.  Ef þú ætlar að kjósa hann í guðs bænum gerðu það á öðrum forsendum en þessari.

[Gaukur Úlfarsson, 11.5.2007 kl. 13:46]

Sæll Sigurður og takk fyrir fínt koment. Ég get hreint alls ekki verið sammála þér í því að ekki sé til neins að biðjast afsökunar. Held einmitt að fólk sem hefur verið beitt svona hrikalegu óréttlæti hljóti að þrá að heyra afsökunarbeiðni. Auðvitað er slík afsökunarbeiðni innantóm ef henni fylgir ekki yfirbót í formi mikillar aðstoðar. Ég get því engan veginn séð hvernig það að vekja máls á þessu flokkist undir lýðskrum.

Annars tiltók ég aðra ástæðu fyrir þessu vali mínu. Hún er sú að VG hafa einir staðið náttúruverndarvaktina. Nú þegar að Íslendingar hafa vaknað upp af vondum stóriðjudraum þá hlaupa hinir flokkarnir til og mála sig grænum og umhverfisvænum litum. Þaðan sem ég kem, er það flokkað sem lýðskrum.