Uppljóstrun!

Ég var beðinn um að svara því, í spurningu við færsluna hér að neðan, hvaða flokk ég ætlaði að kjósa í komandi kosningum. Ég hef sagt það áður að ég er óflokksbundinn og að ekkert af flokkunum höfðar 100% til minna skoðana. Aftur á móti hef ég nú gert upp hug minn. Margir myndu kannski segja að ég hafi verið búinn að því fyrir löngu en svo er ekki. Eftir að hafa horft á fjörlegar umræður á Stöð 2 í gær fékk ég staðfestingu á því hverja ég ætla að kjósa.

Að mörgu leiti er valið ekkert sérlega fýsilegt. Frjálslyndir strokuðu sig út með innflytjenda-umræðunni, Samfylkingin með lýðskrumi í fjölda mála, Framsókn með stóriðjuofstæki, ömurlegri kosningabaráttu og ábyrgðarleysi í spillingarmálum og Íslandshreyfingin með ósannfærandi uppstillingu á listum sínum.

Þá eru eftir 2. flokkar. Sjálfstæðisflokkurinn og VG. Að mörgu leiti á ég mest sameiginlegt með stefnu margra innan Sjálfstæðisflokksins. Ég verð meiri og meiri frjálshyggjumaður með hverjum líðandi degi. En Sjálfstæðisflokkurinn er bara ekki mjög sannfærandi sem frjálshyggjuflokkur. Kannski hann hafi litast svona af samstarfi við Framsókn? Kannski togast þarna á ýmiskonar öfl og þar tapar hreinræktuð frjálshyggja oft fyrir íhaldssömum og rykföllnum hugmyndum? Eitt er víst, að frjálshyggjan ræður ekki þegar flokkurinn stendur í stórkostlegum atvinnu-töfralausnum á borð við Álver hér og þar um landið. Ekki hjálpar Sinnuleysið gagnvart því frábæra tækifæri að fá að taka þátt í risa tónleikahaldi sem 2 miljarðar manna yrðu vitni af og íslensk tónlist fengi notið góðs af. Hversvegna skyldu ráðandi öfl ekki hafa stokkuð um borð án þess að hika? Sjálfsagt vegna þess að náttúruverndarboðskapurinn var þeim ekki í hag. Ekki hjálpar til stuðningurinn við Írakstríðið. Ekki hjálpar til nýi skandallinn hans Björns Bjarnasonar. Þetta ásamt því að ég held að það sé einfaldlega nauðsynlegt og holt fyrir land og þjóð að breyta til, er ástæða þess að ég get ekki hugsað mér að kjósa íhaldið.

Í þætti Stöðvar 2. í gær voru leiðtogar flokkana beðnir um að segja hver yrðu fyrstu verk þeirra ef þeir kæmust til valda. Steingrímur J. sagði m.a. að taka Ísland af lista þeirra sem styðja blóðbaðið í Írak, biðjast formlega afsökunar og hefjast handa við aðstoð flóttamanna þaðan. Þessi maður fær atkvæði mitt. Maður sem ásamt fáliðuðum þingflokki hefur staðið umhverfisvaktina einn flokka, áður en það komst í tísku að vera grænn einsog allir flokkar virðast vera orðnir í dag. Ég er ekki alltaf sammála öllu sem hann segir, en þegar ég hef forgangsraðað hlutunum, þá er valið augljóst.

x-v

Veriði sæl!

Framsóknar-Spillingin Heldur Áfram!

Ég horfði á upptöku af íslandi í dag áðan og litlu mátti muna að ég kastaði upp múslíinu frá því í morgun. Langt er síðan ég hef séð annað eins tilfinningaklám matreitt ofan í fólk. Hverskonar fávitar halda Framsóknarmenn að þjóðin sé?
Súmerum aðeins málið upp;
1.Stúlka með lögheimili hjá ráðherra framsóknarflokksins fær óumdeilanlega algera sérmeðferð í veitingu á íslenskum ríkisborgararétti.
2. Kastljós flytur fréttina á eðlilegan hátt. Enginn úr alsherjarnefnd man neitt, Jónína svarar engum spurningum, sýnir valdahroka og talar um ofsóknir, en gefur í skyn að stúlkan hafi mátt þola einhverskonar mannréttindabrot í heimalandi sínu.
3. Kastljós er með skýrsluna undir höndum, þar finnst ekkert um mannréttindi, heldur einungis að það "kæmi sér ílla fyrir stelpuna að vera ekki með íslenskan ríkisborgararétt, mikil og leiðinleg pappírsvinna" auk þess sem þar kemur fram að hún hafi fengið ótrúlega flýtimeðferð í kerfinu.
4. Jónína Bjartmarz sendir frá sér yfirlýsingu þar sem hún hagræðir sannleikanum og styllir sér upp sem fórnarlambi.
5. Þórhallur Gunnarsson ritstjóri Kastljós, rekur yfirlýsinguna þvert ofaní Jónínu tilbaka.
6. Tengdadóttir Jónínu kemur í viðtal í Ísland í dag til Framsóknarmansins Steingríms Ólafssonar. Þar fullyrðir hún að Jónína hafi ekki beitt sér í málinu.

Já okey.. má þá ekki bara hætta að ræða málið? Ég meina, hún kemur þarna fram sjálf og segir að Jónína sé saklaus, þá er þetta náttúrulega bara afgreitt mál. Ehaggi?? Allir í gúddí fíling? Ha?
Hverskonar fréttamenska er þetta? Það er engin furða að áhorfið á ísland í dag sé álíka lítið og fylgi framsóknar þegar svona hroðbjóður fær að viðgangast þarna. Er enginn sem spyr neinna spurninga? Fyrverandi aðstoðamaður Haldórs Ásgrímssonar tekur viðtal við sæta litla stelpu og hrósar henni fyrir hvað hún sé nú dugleg að tala málið, hvað hún sé dugleg í skólanum og hvort henni finnist ekki íslendingar vera bara klikk að ofsækja tengdó svona??
Ég get ekki orða bundist lengur. Framsókn svarar ásökunum um spillingu með meiri spillingu! UGH..!! Þvílík siðblinda!

Ég get vel borið virðingu fyrir fólki sem kýs Sjálfstæðisflokkinn og á marga vini sem gera það, en ég segi það fullum fetum að þú þarft að vera ílla gefinn einfeldingur til þess að kjósa Framsókn; spillingu áfram ekkert stopp!

Veriði sæl!

Skammastu Þín Sigmar!

Horfði á kastljósið á netinu eftir að ég kom heim úr vinnu í kvöld. Geir Haarde var þar afar glæsilegur að vanda, fannst reyndar til háborinar skammar að sauðsvartur almúginn skyldi spyrja hann útí hvað hann hygðist gera varðandi hluti einsog bága stöðu ungs fólks á húsnæðismarkaði, fátækt eldri borgara og tannhirðu barna.. hverskonar ósvífni er þetta eiginlega? Kann fólk enga mannasiði? Ónáða þennan mikla þjóðhöfðingja okkar með svona ósvífni?? En Geir hristi þetta af sér með stakri prýði, lét ekkert uppi hvort einhverjar bætur yðru gerðar fyrir þá sem minnst hafa úr að moða.. hafiði það bara og skammist ykkar!

Annar maður sem má svo sannarlega skammast sín er Sigmar Guðmundsson!! Er nú ekki nóg komið Simmi? Ha? Er það þessi óþokki hann Helgi Seljan sem er að hafa þessi ömulegu áhrif á þig? Draga fram þessu óþæginlegu upplýsingar um hæstvirtan ráðherra í ríkisstjórn íslands? Hvað vakir eiginlega fyrir þér maður? Nú segjum við stopp!! Já.. ég veit vel að við höfum eytt miljónum í auglýsingarnar okkar sem segja "ekkert stopp" en nú bara verðum við að gera undantekningu, NÚ SEGJUM VIÐ STOPP!

Auk þess sem þetta mistókst alveg hjá þér þessi rógburður. Það kom skýrt fram að tengdadóttir Jónínu á eftir að vera að koma og fara héðan frá landi mikið á næstu árum, þar sem hún er á leið í nám erlendis. Ef hún fengi ekki ríkisborgarrarétt þyrfti stúlkan að standa í þvílíkri pappírsvinnu!! Svoleiðis nokkuð er ekki bjóðandi tengdadóttur ráðherra Framsóknarflokksins. Auk þess sem hún gæti ekki sótt um Námslán hjá LÍN væri hún ekki ríkisborgari hér.. Ég get nú bara ekki séð neitt athugavert við þetta..

Mér finnst með ólíkindum að fréttastofa RUV ásamt ritstjóra Kastljóss leyfi þessum gemlingum að vaða uppi með svona svívirðingar! Gera þeir sér ekki grein fyrir því hversu ílla þetta kemur út fyrir okkur? Hvernig væri nú að sýna smá tilitsemi svona rétt fyrir kosningar.. ??

Ég krefst þess að Sigmar, Helgi Seljan, Páll Magússon og Þórhallur Gunnarsson segi af sér tafarlaust og ráðin verði Siv Friðleifsdóttir í stað þeirra allra! Annað væri skandall!

Veriði sæl!

Silfur Egils

Horfði á hressilegar umræður í Silfrinu fyrr í dag. í uppgjöri vikunar sátu fulltrúar fjögurra stærstu flokkanna ásamt Agli, sem vildi meina að þessi kosningabarátta væri leiðinleg.. Ég get ekki tekið undir það. Mér finnast þetta gríðarlega spennandi kosningar. Að vissu leiti er það rétt að hún hefur svolítið snúist um skoðanakannanir sem birtast nokkrar á dag og sveiflast töluvert, en maður finnur samt sem áður fyrir gríðarlegum taugatitringi meðal frambjóðenda allra flokka. Hér á blogginu er hnakkrifist og oft heldur ómálefnalega, líkt og stuðningsmenn fótboltaliða gera svo gjarnan.

Það hefði nú verið mun heppilegra ef Egill hefði haft Jón Baldvin í þessum þætti frekar en fyrir viku í ljósi þessa spillingamáls sem upp er komið þar sem Jón er nú sérfróður um spillingu. Hann hefði getað rakið fyrir okkur mál einsog skinku-töskuna sem hann flutti inn á sínum tíma, brennívínsboðið hennar Bryndísar sem þjóðin borgaði auk þess sem hann hefði getað upplýst þjóðina um sitthvað nýtt sem hann hefur haft fyrir stafni, sem svo margir vita af en enginn þorir að nefna.

En aftur að þættinum. Valgerður háði tapaða baráttu með því að reyna að afmá spillingarfýluna af flokki sínum. Kannski er það rétt hjá Framsókn, að þjóðin sé heimsk, en svona heimsk er hún ekki. Í kjölfar þess að restin af viðmælendunum jánkuðu því að þetta mál þyrfti að ransaka ofaní kjölinn, nötraði Vala af bræði og náði sér aldrei á strik. Guðlaugur var ágætur en Ömmi hefur verið betri.

Sá sem mér fannst bera af í þættinum aftur á móti var Össur. Aldrei bjóst ég nú við því að segja þetta þar sem ég get nú varla talist til mikilla aðdáenda hans flokks, en hann naut sín afar vel í dag og raunar hefur það verið áberandi hvað Össur hefur verið að sækja í sig veðrið uppá síðkastið. Kannski er það vegna þess að Davíð er horfinn af leikvellinum? Davíð hafði einstakt tak á Össuri ásamt svo mörgum örðum og tókst honum ósjaldan að láta Össur líta út einsog kjána. Nú er hann aftur á móti farinn og það er einsog Össur sé allt annar maður. 

Annað sem mér fannst áberandi, var hve vel fór á með þeim Ögmundi og Össuri. Það vantaði bara að þeir blikkuðu hvorn annan og gæfu hvorum öðrum high five af og til. Þeir sjá þá vonarglætu að saman takist þeim að fella stjórnina, og til þess að svo megi verða, verði þeir að hætta að berjast sín á milli. En hvernig ætlar þeim að takast þetta á þeim 2. vikum sem eftir er af baráttunni?

Ef ég sæti í nefnd sem tæki þetta mál upp myndi ég leggja fram eftirfarandi;

Nú þarf að láta af eineltinu á hendur Framsókn. Þeir eru fullfærir um að leggja sjálfa sig í einelti með misheppnaðri kosningabaráttu, spillingarmálum og steinaldarstóiðjustefnu. Auk þess halda þeir stífum fókus, á öllum sínu klúðri, hér á internetinu og því er óþarfi halda þeim málum á lofti, þeir gera það sjálfir. Einsog ég sagði, framsókn leggja sjálfa sig í einelti og eru á góðri leið með að fá flokkinn niður fyrir fylgi frjálslyndra.  Nú þarf að vaða í risann ógurlega. Hann hefur setið til hliðar fullkomlega óáreittur. Þeir þurfa varla að auglýsa neitt, samt mælist flokkurinn á flestum stöðum í svipuðu fylgi og í síðustu kosningum?? Þrátt fyrir Írak!!?? Þrátt fyrir Kárahnjúka og allan þann hildarleik sem þar hefur átt sér stað!!?? Þrátt fyrir ójöfnuðinn sem sífellt vex og vex!!?? Er Árni Johnsen virkilega á leiðinni á þing aftur??

Þett yrðu mínar tillögur ef ég sæti í nefnd um hvernig fella ætti ríkisstjórnina. 

 

Ég hef sagt það áður og segi það aftur, ég er óflokksbundinn áhugamaður um pólitík

 

Veriði sæl! 

Helgi Seljan

Það er nú svolítið einsog sparka í liggjandi hund að ætla að halda áfram að níðast á framsókn. Þeir virðast vera fullfærir um að grafa sína gröf sjálfir. Þeim er algjörlega ófært að tjá sig í fjölmiðlum, á netinu, eða í auglýsingum án þess að það verði að aðhlátursefni þessa daga.
Það virðist vera sem að um það hafi verið tekin ákvörðun hjá framsókn, eftir að Helgi Seljan sinnti skyldu sinni sem fréttamaður og flutti þjóðinni þær fréttir að tengdadóttir Jónínu Bjartmarz hefði hlotið sérmeðferð í kerfinu við umsókn sína um ríkisborgararétt hér á landi, að láta sem Helgi Seljan sé sökudólgurinn.
Þetta er sjúklega siðlaust..

Í stað þess að ganga frá málinu í reisn, láta Jónínu segja af sér, viðurkenna mistökin hvort sem þau voru viljandi gerð eða ekki og reyna að fá vekja samúð þjóðarinar, þá fer flokkurinn þá leið að gera Helga Seljan tortryggilegan í þessu máli..? Helgi Seljan er sem sagt nýji vondi kallinn. Ég ætla að segja þetta aftur;
ÞETTA ER SJÚKLEGA SIÐLAUST!

Nú er bara spurning um hvort Framsókn fari ekki í að gera nýjar teiknimynda-auglýsingar, skifti út VG og vonda rauða kallinum honum Steingrími J. og setji inn Helga í staðinn??

Veriði sæl

Hátt glymur í tómri tunnu

Ég er einn heima í kvold, Heklugos fór með mömmu sinni í heimsókn útí bæ, þannig að ég hef fullkomin völd yfir lífi mínu frameftir kvöldi og veit ekkert hvernig ég á að haga mér. Finnst einsog ég þurfi að eiga playstation og pitsu, stilla græjurnar í botn og panta mér landa, en því miður á ég enga playstation og allir pitsustaðir eru lokaðir vegna dags þjáningarinar. Þannig að ég fékk mér bara brauðsneið og kveikti á sjónvarpinu hlýja sem er einmitt kveikjan að þessum pistli mínum.

Stílistinn hjá RUV hefur augljóslega verið með hita í kvöld, einstaklega klaufalegt þuluhornið var skreytt með einhverjum hvítum kertum í forgrunni rammans sem brunnu alveg út. Sérstaklega misheppnað.
Mér tókst samt að líta framhjá þessu, kynna mér dagskrá kvöldsins og reyndi svo að horfa á Ferðalag keysaramörgæsana.. mér finnst að það ætti að vera svona sértök viðvörun á svona myndum; þessi mynd er einstaklega væmin og ber keim af franskri tilfiningasemi á háu stigi. Úff hvað ég get ekki svona myndir..

Stöð 2 virðist halda dag þjáningarinar hátíðlegan með X-Factor úrslitakvöldinu. Sá þetta prógram fyrir viku síðan í fyrsta skipti, ég bara veit hreinlega ekki hvað ég á að segja, íslenski bolurinn hefur sokkið á nýtt level. Þarna eru samankomin einhver rétt undir meðallagi hæfileikarík krakkagrey sem syngja kareokí í rándýrri útsendingu sem er svo plögguð fram og tilbaka í öllum miðlum 365. Er farinn að hallast að því að Davíð hafi haft rétt fyrir sér með fjölmiðlafrumvarpið sitt. Til dæmis var fréttablaðinu dreift í gær með þykku aukablaði um x-factor, rétt einsog hér væri um stórviðburð í íslensku menningarlífi að ræða. Það er mín skoðun að blaðið smáni sjálft sig með svona plöggi á samstarfsmiðlum. Sérílagi þegar um prógram einsog þetta á í hlut. En það sem gerir mig svolítið sjóveikan er hvað fólk er ginkeypt fyrir þessu og í raun getur enginn útskýrt hversvegna. Svona prógrami er best lýst sem miklar umbúðir utan um ekki neitt. Korteri eftir að þessu lýkur er öllum sama um hver vann og krakkagreyið sem er búið að fá þær upplýsingar að það sé megastjarna frá hinum alvitra Einari Bárða skilur ekkert í því afhverju það þarf að fara að vinna í Hampiðjunni aftur, og afhverju það fékk bara 50.000 kall fyrir metnaðarfullu coverlagaplötuna, þessa þarna með be-gee´s laginu, sem seldist í 400 eintökum í verslunum skífunar-sem fullkomnar 365 hringinn auðvitað.
já.. þetta er auðvitað bara bisness, allt gott um það að segja, en mikið er þetta ömurlega leiðinlegur bisness!

Eins gott að ég keypti mér Beavis And Butthead vol.1 á dvd um daginn..

Veriði sæl!

COPS

Var að horfa á cops í gær í kastljósinu. Einhverjum suðurnesjagreyjum snúið niður og hassplötur gerðar upptækar. Afar spennandi sjónvarpsefni. Það er eitthvað við það að sjá fólk með buxurnar á hælunum í sjónvarpi sem er hreinlega ávanabindandi. Þetta er sama lögmálið og með DV þegar þeir voru uppá sitt besta, alment var fólki meinílla við vinnubrögð blaðsins, en gat ekki setið á sér við að kaupa sér eintak, því það verður eitthvað svo ávanabindandi við það að gæða sér á ógæfu náungans.

 

Ekki er langt síðan að það var nóg fyrir gægjuþörfina í okkur að fá að líta inn til fólks í þáttum einsog innlit útlit og tímaritum einsog hús og híbýli. Núna þurfum við meira, kíkjum heim til Dodda keðju með hasshund og rótum í óhreinatauinu hans.

 

Ég er með hugmynd að sjónvarpsþætti; eftir að búið er að sturta úr kryddhillunum hjá þessum ógæfupésum, fáum þá Arnar Gauta og Völu Matt til að koma inn og analísera íbúðina, fara yfir hvað mætti betur fara og svo tæki við sjónvarpsmarkaður þar sem okkur verða kynnt tilboð vikunar í húsasmiðjunni á gas-arni og valhnetuparketi.

 

veriði sæl.